Pwofesè lekti eksplike nan setyèm, uityèm ak nevyèm ane
fondamantal. Pwofesè ekonomi nan NSI, NSII ak NSIII. Pwofesè anglè nan nouvo
segondè II. sikològ, maso-thérapeute, edikatè sou lavi relasyonèl, afektif ak
seksyèl. Redaktè, fòmatè, animatè atelye
ak konferansye. Prezantatè emisyon, fondatè epi responsab « Sérénité du
Cœur » …
Se sèlman kèk pami fason nou ka prezante Lennie Miranda PIERRE,
yon jèn fi ekstrawòdinè k ap fè anpil travay pozitif nan kominote a, nan pote
konstribisyon li tribòbabò ak ede moun jwenn lapè nan lespri yo epi rete kè
poze, malgre move tan ak sitiyasyon malouk lavi an Ayiti dènye sezon sila yo.
Li se yon modèl pou lòt jèn ak yon pakou enspiran epi yon motivasyon san fay,
se pou sa nan JEUNE PENSEUR, nou deside mwa sa, avril 2024, se inisyativ ak
enpak li yo n ap pataje, ak tout privilèj nou jwenn pou fè sa, ak esperans tou,
prezantasyon sa sou Lennie pral ede divès lòt jèn pi byen trase chimen yo. Brèf
!
Nou pa vle kòmanse ak sa nou konsidere petèt kòm yon
kliche, men lanmou Lennie ak detèminasyon li pou travay ta sanble lye ak dat li
fèt la, piske li pran nesans nan komin kafou, zòn metwopolitèn peyi Ayiti nan
dat premye me, dat sila ki se fèt Agrikiti ak Travay lakay nou. Li fè tout klas
primè li nan « École Fondamentale Advantiste de Diquini » epi li fè
klas twazyèm sik yo nan « Collège Adventiste de Diquini, toujou nan vil
natal li… Pou klas segondè li yo, se an Repiblik Dominikèn li fè yo, presizeman
nan kolèj advantis UNAD ki nan vil Sonador, kote li fè ekivalan klas segonn ak
reto, ak yon lekòl prive katolik nan Santiago de los Caballeros, kote li fè
klas filo li.
Lè Lennie soti nan peyi vwazen an, li vin abite dezyèm
vil peyi a ki se Okap, kote li ta pral tanmen pakou Inivèsite li nan Sikoloji
ak yon kisis lisans li te suiv nan « Université Frannco Haïtienne Du
Cap-Haïtien (UFCH) ». Nan moman atik sa ap redije a, sikològ Lennie ap
kontinye etid li ak yon mastè nan Sikoloji Klinik, toujou nan UFCH.
Pandan tout anfans Lennie, se medsin li te renmen, li pa
te karese okenn lòt rèv pou karyè li. Li te toujou vle vin yon pedyat oubyen
yon newochirijyen. Si jodya l ap kontinye karyè li nan sikoloji se an pati
paske move moman epidemi kowona yo nan lane 2019 te malerezman lakoz li te fè
yon lane chita apre li te fenk tounen Ayiti soti an Repiblik Dominikèn. Ane
chita sila te ofri l okazyon reflechi plis sou kèk reyalite ak revize sa li vle
vrèman pou lavi l. Se apre sa li vin deside etidye sikoloji ki te atire
kiryozite l plis pami lòt opsyon ki ye te vini nan refleksyon li yo, tankou
nitrisyon ak syans enfòmatik. Yon etid li te vin tonbe vrèman damou reyèlman
nan dezyèm ane, lè li te kòmanse fé non l pami meyè etidyan nan pwomosyon li
an, ak lè li te tanmen konstate gen yon gran bezwen pou sikoloji ak sante
mantal nan kominote a.
Menm konsta sa te motive Miranda kreye « Sérénité du
cœur » nan menm epòk la, yon enstisyon
ki te pran nesans ofisyèlman nan mwa jen 2022. Nan kòmansman travay yo se te
pale sou sikoloji ak sante mantal sou rezo sosyal yo epi bay konsèy motivasyon.
Men depi aparisyon epizòd bwa kale” yo nan peyi Dayiti, estrikti a te vin
agrandi vizyon yo an plis. Aktyèlman «Sérénité du cœur» anba direksyon Lennie
Miranda, se yon enstitisyon ki ofri sèvis tankou fòmasyon ak atelye sou sikoloji,
èd pou sante mantal, konsèy sou byennèt, akonpayman sikolojik, coaching ak
devlòpman pèsonèl, jesyon tan, elt. « Angwo se yon espas kote nou ede moun
jere sante mantal yo, devlope tèt yo ak ede yo devni yon meyè vèsyon yo menm
demen. Ni
timoun, ni granmoun, tout kategori moun an jeneral », pou repete sa
Miranda di nou mo pou mo.
Nan nivo pèsonèl, madmwazèl Pierre pase anpil tan nan fè
konferans ak fòmasyon gratis pou ede moun byen pran swen sante mantal yo. Depi
kèk tan jèn sikolològ sla souvan fè pati entèvenan anliy tankou an prezansyèl k
ap pran lapawòl chak fwa nan aktivite ki gen rapò ak sikoloji yo, sitou
aktivite ki fèt nan zòn Nò peyi a. Li te konn kontinye menm travay sa nan
emisyon dyagnostik li te anime ak yon lòt kolèg sikològ sou « Radio Télé
Cohésion » chak dimanch onzè pou rive midi, kote li te konn sitou fokis
nan eksplike fenomèn sikolojik yo ak kijan pou moun nan popilasyon an fè fas ak
yo. Emisyon an fè yon kanpe pou moman sa.
Nan menm fil lide sa, li pwofite di tout sa sikoloji pote
nan lavi l... Lennie fè konenn gras ak etid li nan domèn nan li konprann yon
ansanm fenomèn k ap pase zòn lakay li ak nan anviwònman li. Konesans li nan sikoloji fè l pa asosye
fenomèn sila yo ak koz sinatirèl oswa koze djab, men pito li gade yo ak yon zye
syantifik epi toujou chèche jwenn solisyon pou yo. Li vin ka plis adapte l ak
kèk twoub epi pa dramatize lè l kwaze yo. Pi lwen toujou, sikoloji pèmèt li
devlope rezilyans lakay li, kiltive plis tolerans ak genyen plis
respè pou tout kategori moun.
« Nan legliz, nan lekòl, nan mache, nan kominote jèn
…; mwen agaje m pou m enfòme ak pote sipò m bay nenpòt gwoup sosyal »,
pawòl Lennie Miranda Pierre. Li kontinye pou l di : « Men m konn
dekouraje, demotive, rive nan pwen kote m konn anvi bay vag ». Men wi !
Malgre motivasyon ak kouraj li, Lennie avwe li konn deprime, vle pèdi fòs. Li
konn ap doute, mete tèt li an kesyon, elt. Men lè l raple l gen lòt moun ki ka twouve yo nan menm sitiyasyon ak li san wè
kisa pou yo fè. Lè l sonje tou, dapre eksperyans li, kantite travay ki merite
fèt nan sa ki gen pou wè ak jesyon sante mantal an Ayiti ak lè l sonje tout
bezwen ki gen yo, li retounen motive byen rapid. Chak lè moman sa yo rive, li
leve kanpe pou l kontinye, pakse "depi gen lavi, gen espwa", yon
bagay li di tèt li chak jou.
« Jeune
penseur » sila ki pral gen sèlman venteyen lane nan dat premye me 2024 la
fè konnen, malgre èd anviwònman li ki enpòtan, tout sa li ta renmen vin ye
demen repoze sou kont li pèsonèlman. Se sa ki fè avan li fè yon chwa, avan chak
aksyon li pral poze, li toujou pran tan reflechi ak ki enpak li pral gen sou
lavi l ak lavi lòt moun, apre senk, dis, kenz pwochen lane yo. Li rale menm
panse sa pou motive l leve kite kabann li chak maten pou l kontinye goumen pou
rèv li ak kontinye pote konstribisyon li nan tout fason li kapab.
Nan menm kesyon travay pou rèv li yo, Lennie ta swete nan
kèk lane li devni yon gran konferansyè entènasyonal ak omwen yon prezantasyon « TED
TALKS », sa t ap fè l plezi anpil, se yon minimòm li vize pou fiti li. Li
anvi tounen yon referans nan zafè sikoloji ak sante mantal nan peyi a. Li
pwomèt tèt li pou l kontinye travay jiskake yo ka konsidere l kòm yon moun ki (te)
jwe gwo wòl nan domèn sa sou tè Desalin nan. « Mwen vle kontinye fè enpak,
mwen vle devni yon pwofesyonèl Ayiti ap ka konte sou li reyèlman », li
pwononse ak yon gran souri epi fyète nan vizaj li. Epi pou enstitisyon l ap
dirije a « Sérénité du cœur », sikològ Miranda swete nan kèk lane li
tounen yon referans nan ede rezoud tout kalite pwoblèm sikolojik sitwayen
ayisyen yo ap konfwonte… Se tout rèv sila yo ki ede l kenbe, malgre latriye
difikilte yo, menm lè li pa wè ni devan ni dèyè. San li pa bliye mansyone pakou
enspiran yon ansanm lòt moun an Ayiti tankou lòt bò dlo ki konn double
motivasyon l tou, pou l kontinye fè tout efò posib pou l avanse.
Pou mezire enpak li yo, Lennie ka konte sou divès kalite
temwayaj li pa janm sispann jwenn sou entèvansyon li yo ak sou fason sèvis
akonpayman « Sérénité du cœur » yo ede moun ki benefisye yo. Fason
rezo li ap grandi ak moun k ap felisite l tanzantan oswa mande sèvis li menm
nan lari, se lòt bagay ki fè l ka di konstribisyon li yo pote fri. Gen moun ki
konn vin remèsye l epi presize pou li egzakteman ki pwoblèm yo te gen ki rive
soliyone gras ak èd li. « Chak fwa m jwenn ka sa yo, m eksprime gratitid
mwen epi m redouble efò m », pawòl Miranda di nou ak larekonesans nan vwa
li.
Lennie Miranda Pierre genyen twa konsèy pou jèn parèy li
yo ak tout moun an jeneral. Premye a se sitasyon anglè ki di « no risks,
no story », pa gen reyalizasyon, pa gen istwa, pa gen siksè san risk.
Mantalite sa ede Miranda anpil, li panse tou l ap ede tout moun avanse, pandan
li presize se risk ki kalile ak raple nou dwe evite risk initil yo. Dezyèmman
li vle chak moun pran konsyans yo gen pouvwa pou chwazi sa k ap bon pou yo, pou
nou toujou fè bon chwa ak pran bon jan desizyon konsènan antouraj nou ;
liv n ap li, mizik n ap koute, fim n ap gade, elatriye. Paske chwa sa yo se ye
yo ki pral detèmine ki moun ou pral ye demen ak kisa n ap rive reyalize nan
lavi nou. Twazyèm nan se bat pou n toujou kite yon bon souvni, yon enpak
pozitif chak kote nou pase. Se pou nou fè sèten prezans nou yon kote te kontribiye
nan pote yon chanjman benefik. Pou fini Lennie di ak yon vwa senserite « se
pou n pran responsablite nou, se pou n deside di tèt nou n ap yon eleman pou
transfòmasyon pozitif kominote a ». Yon twazyèm konsèy li espere k ap
touche sitou « timoun 2000 » yo, jenerasyon li ladan an ki malerezman
gen yon repitasyon ki pa rete li alèz ditou.
Avan menm seri angajman kominotè, karyè pwofesyonèl ak
akademik Lennie Miranda Pierre, li se jeneralman yon moun ki menm jan ak tout
moun, men ak yon istwa diferan epi yon pwofil karakteristik ki rezime ak twa
adjektif : Diskrè, Konstan, Atansyone; dapre evalyasyon li fè li menm menm sou
tèt li. Lennie itilize twa fòs karaktè li sila yo chak segonn nan lavi l.
Toutotan li poko reyalize sa li te fiske pou objektif, li p ap sipann travay. Dayè
li gen yon lòt eslogan pou gide l ki di « Le ciel n’est pas la limite pour
moi. Je dois monter encore plus haut. » Atansyone li atansyone an se yon
karaktè ki ede l antisipe bezwen pwòch ak kòlèg li yo, sa ki mennen pi bon
kolaborasyon ant yo ak li menm. Konsa tou li prefere solidarize l ak moun ki gen lespri
ouvè. Dapre li moun sa yo pa awogan, yo pa monte tèt yo twò wo, yo respèkte
moun, yo gen imilite, elatriye. Eleman sa yo ap pèmèt kouran pi byen pase ant
Miranda ak kolaboratè li yo, toujou nan yon anbyans byenveyan, aprantisaj mityèl,
echanj eklere ak bon jan negosyasyon lè li nesesè.
Pou fini, moso lapawòl sa yo sou karaktè, pakou ak
konstribisyon Lennie Miranda Pierre nan kominote a montre l klè : laj, sitiyasyon peyi ak difikilte lavi pa
eskiz pou w sispann batay ak tout ou menm pou reyalize rèv ou. Menm jan «jeune du mois» a di l la, ou
se « aktè prensipal lavi w», pa neglije bay tout ou menm pou entrig
la pran direksyon ou swete a. Felisitasyon sikològ Lennie, kontinye rete fokis
nan travay pou rèv ou, kontinye pote sipò w nan kominote a. Mèsi pou chak
askyon pozitif ou poze yo. JEUNE PENSEUR swete w siksè pou tout sa k ap vini yo. Et
déjà, un très JOYEUX ANNIVERSAIRE à toi !!!