ANSANM NOU KAPAB

Kredi foto: Telechaje sou Google

Yon peyi ki libere depi 1804 men ki toujou ap pase tray. Yo bay li tout vye non, yo imilye l ak meprize l, lot nasyon pase l anba pye, ata menm moun ki fèt ladan l pa vle rete. Anpil moun ap di li pa ofri anyen, anpil moun ap di eta l kritik, men se yon ponyen sèlman ki wè nou pa ofri l anyen tou, yon ti ponyen sèlman ki vle travay pou li vanse. Podyab! Anpil nan nou kite sila yo ki pa vle wè l enflitanse nou epi ti rès ki rete nan nou yo vin twὸ fèb pou montre Ayiti se yon peyi ki chaje ak richès.

Nou kite enterè pèsonèl bouche je nou, nou kite ti kras kὸb separe nou, nou bliye si nou gen yon peyi pou nou defann, yon endepandans pou nou konsève. Nou rete toutan n ap di nou gen yon bèl pase, yon bèl listwa, n ap pale, n ap pale kὸman yon bann vanyan gason te goumen, kὸman yo te mete tèt ansanm pou nou te soti anba otorite blan franse, epoutan, nou pa fè anyen pou tout bèl pase ak  bèl listwa sa yo pèdi vale yo. Nou pa vle mete tèt ansanm pou nou vize enterè peyi a. Tout kote n pase se ti klan, ti pati, epi nou toujou ap goumen ak lὸt. Tout jounen n ap di Ayiti malad, nou pa menm ka rann nou kont se nou ki dὸktè ki pou geri l. Nou pito kouri kitel olye nou travay pou li vanse. Lè n ap kitel konsa, kiyès ki pral travay pou li? Omaj pou tout moun ki ale men ki toujou rete ayisyen; nan jan nou panse, nan jan n ap ede peyi a vanse epi nan jan nou prèt pou nou envesti nan li.

Ayiti se yon peyi pὸv ki chaje ak richès. Pὸdyab! Nou pa konnen kὸman pou nou eksplwate yo. Anpil lὸt nasyon vle gen Ayiti, poukisa li pou nou epi nou pa vle wèl? Tout moun ap reve yon ayiti meyè men konbyen nan nou kap goumen pou rèv sa reyalize vre?

Sa parèt lèd lè yon etranje vizite nou, nou pa ka mache avèl paske lari a lèd ak fatra? Sa parèt lèd  lè wout ki mennen nan yon lye touristik sal? Nou toujou santi nou vèkse lè nou wè konsekans zak nou. Epi n ap di se sèl leta ki koupab! Se nou kap viv kote ki sal yo, men nou vle se leta ki pou netwaye yo.  Pwoblèm santé, sekirite, edikasyon epoutan lajan pèp la ap gaspiye: move dirijan. Nou tout koupab paske si nou tout te mete men Ayiti tap bèl anpil.

Ayiti merite plis nan men nou, se pa nan di li pa ofri anyen l ap vin pi bon, men se lè nou kὸmanse ofril potansyalite nou, konesans nou, fὸs nou ak kouraj nou, n ap respire yon pi bon lè. Ayiti, jodiya, ki pa gen elektrisite, manje, dlo trete, sekirite ak wout ka vin yon kote ki gen bon jan vi. Ayiti, jodiya, ki pa gen estabilite ak lapè ka vin yon kote ki byen estab. Ayiti, jodiya, ki se yon peyi k ap fè bak ka vin yon peyi devlope. Se nou ki pou travay pou li, se nou ki pou eksplwate riches li yo pou nou ka viv yon bèl ayiti pwὸp nan tèt ansam, lapè ak lanmou.

Danienska Edgar DORSAINT

Finissante en Psyschologie